Продукция күләмен арттыру өчен торак булачак

“Сөт иле - Чулман” филиалына караган Тәкермән хуҗалыгының капиталь төзекләндерелә торган бер торагында бу көннәрдә кызу эш кайный. Узган елда да бу хуҗалыкта таналар өчен бер торак төзелеп файдалануга тапшырылган иде.

Биредә дәүләт программаларының тагын берсе – ферма­ларны һәм силос базларын ка­питаль ремонтлау программасы буенча яңа абзар салына. Аның смета бәясе – 4 миллион сум. Бу программаның өчтән беренә генә хөкүмәт акча бирә, калганы хуҗалык исәбенә башкарыла. Моның өчен алар Минзәләнең “Сферастрой” ҖЧҖ белән килешү төзеп түбәсен проф­настил белән япканнар. Эчке ягына такта куеп җылытканнар. Түбә эшләре хуҗалыкка 700 мең сумга төшкән, торакта яхшы һава булсын өчен түбә өстенә дүрт җирдән махсус җилләткеч куйганнар, поликар­бонат беркетелгән. Шулай бул­гач монда ферма эченә тиешле күләмдә яктылык та төшә дигән сүз.

Аннары бу торакның стена­ларын панель беркетеп чык­каннар. Тәрәзәләргә дә поли­карбонат куелган. Биредәге торакның ишеген дә өр-яңадан эшләгәннәр.

Түбә ябылгач эчке эшләр башланган, бу эштә авылдагы бюджет хезмәткәрләре булыш­кан, алар стеналарны агарткан­нар, ишекләрне буяганнар. Тауасты Байлар авылын­нан Радик Гыйззәтуллин бөтен электр эшләрен башкарган, кабель сузып, лампочкалар куйган. Казан шәһәренең “Сөт иле”ннән килгән “Стройсервис” ҖЧҖ егетләре: Назыйм Хаме­тов, Равил Насыйбуллин, Вәсил Гайнетдинов көйләү-монтажлау эшләре башкаралар.

Торакның канализациясе өчен чокыр казып 15 кубомет­рлы сыйдырышлы мичкә куел­ган. “Дамилк” фирмасы белән килешү төзелгән, алар мон­да сөт үткәргеч сузу эшләре белән шөгыльләнәләр. То­ракка ТСНны урнаштыруны да хуҗалык үз көче белән башкара, әлеге эшне үзләре эшләгәч 100 мең сум акчаны экономияләгән.

Сөт блогында Алмаз Мардам­шин кафель җәюне төгәлләп килә. Әлеге эш төгәлләнгәч бирегә 2,5 тонналы сөт суыткыч урнаштырачаклар. Бу егетләр иртәнге җидедә эшне башлый­лар, кичке алтыларда гына тук­тыйлар. Абзар төзелеп беткәч монда барлыгы 100 баш савым сыеры асралачак.

безнең белешмә

Әлеге вакытта хуҗа- лыкта 1049 баш мөгезле эре терлек исәпләнә, шуның 510 башы са­вым сыерлары. Бүгенге көндә 4400 килограмм сөт савыла. Киләчәктә сыерлар саны 600 баштан артачак, терлекләрнең баш санын исә 1200 баш­ка җиткерү күздә тотыла. Киләсе елда хуҗалыкта сөт җитештерүне 10 процентка арттыру бурычы куелган.

Дилфас ГАЛИЕВ