Яңа йортлар салынган авыл ташландык була алмый

 Хаттагы “авыл ташлан­дык хәлгә килде” дигән сүзләр белән килешмим. Әйе, Коноваловка зур терлекчелек комплексын югалтты. Минзәлә җиренә килгән инвесторларның да үзәгенә әйләнә алма­ды. Элеккеге “50 лет Та­тарии” совхозы җирләрен өч инвестор эшкәртә хәзер. Комплекс вакы­тында үткән гасырда салынган асфальт уала инде, нишлисең. Әйе, җитештерү юк. Әмма авылның йөзен анда яшәүчеләр бизи бит. Совхоз таралгач, бер мәлне транста булган эшкә яраклы һәркем диярлек соңрак үзенә шөгыль тап­ты. Чаллыда эшләүчеләр дә бар. Бу авылда гына түгел, районның шактый кешесе зур хезмәт хакы алыр өчен читкә йөреп эшли хәзер. Коновалов­када ел саен дистәләп яңа йортлар салына.

Күбесе үз көчләре һәм әлеге авылда базасы булган төзелеш оешмасы җитәкчесе Николай Секу­нов ярдәме белән.

23 кеше кул куйган хат­та язылганча, эшләп тор­ган чиркәве, тиздән ачы­лачак мәчете булган авыл ташландык була алмый.

Әйе, соңгы елларда район­да барган дәүләт программа­лары буенча бу авылда бер генә объект та салынмады. Быел мәктәпне ремонтлау­га акча да бирелмәде. Чөнки башка авылларда төзелү елы иртәрәк булган мәктәпләр бар иде. Әмма ходай ярдәм итеп һәм инвесторлар планы тор­мышка ашып, беткән комплекс урынына заманча мегаком­плекс төзелсә, авылның йөзе үзгәрәчәгенә шик юк.

Хатта күтәрелгән тагын бер проблема турында фикерем белән уртаклашам. Авылларда су өчен түләү юк. Әлегә суны кулланучыларга җиткерергә мөмкинлек биргән электр энергиясе өчен генә түләнелә. Шәһәрдә, күрше Тукай райо­нындагы авыллардагы кебек, су килүче челтәрләр (яңарту, ремонт) өчен дә түләсәк, та­рифлар югары булачак. Вакыт җиткәч бу челтәрләр хезмәт күрсәтүче махсус оешмага тап­шырылыр ул. Ә хәзергә аларны ямап, ремонтлап тору бюдже­тында акчасы булмаган авыл җирлекләре өстендә.

Флорис Шакирҗанов, Коно­валовка авыл җирлеге депу­таты:

– Заречье ягында яшәүчеләравылның олы ягына чыгучы күпер проблемасын дөрес күтәрәләр. Аны чыннан да ка­рыйсы бар. Буадагы су аның яр­ларын юа. Урманчылар аннан агач ташымыйлар инде. Алар күперне, аңа килү юлларын ре­монтлауга да өлеш керттеләр. Кешеләрдән акча җыюны оеш­тыра алсак (бюджетта акча юк), үз техникам белән ярларны, килү юлларын ныгытырга бу­лышачакмын. Язга чыкканчы бу күперне ремонтлау чарасы табылыр дигән өметтә калыйк.

Сәрия Билалова, Конова­ловка авыл җирлеге баш­лыгы:

– Минем сүзләремне аклану дип кабул итмәсеннәр иде. Ки­леп туган хәлне аңлату өчен халкыбызның “ашаган түгел, тураган белә” дигән мәкале бик туры килә. Заречье урамын­да 12 йорт бар, шуның өчесе дача өчен тотыла, өчесендә тормыйлар, тагын 4 участокка фундамент салынган. Су өчен фәкать өч йортта яшәүчеләр түли. Әлеге йортларны төзегән вакытта техника шушы күпер, урам аша йөрде, төзелеш бул­гач тагын йөриячәк. Өстәвенә, язын урман суларының бер өлеше шул урамнан агып төшә. Бер генә факт. Әлеге күпер һәм асфальт юл безнең хуҗалыкта Илдус Исламов җитәкчелек иткән вакытта, 1992 елда төзелде. Контейнерлардагы чүп атнага ике тапкыр түгелә. Шәхси йортлар янындагы контейнер­лар мәйданчыгы һәрвакыт тәртиптә. Күп катлы йортларда яшәүчеләр исә чүпләрен кап­качы булган контейнерларга түгел, шунда ташлап калдыру­ны хуп күрәләр. Бердәмрәк бул­сак, хатта язылган агымдагы проблемаларны хат язып түгел, күмәк көч белән хәл итәр идек.

 акцент

Бюджетында акча булыр иде, шул ук Коновалов­ка авылында күпчелек пенсионерлар яши. Җир са­лымын тулысынча түләсәләр дә, милеккә салым түләгәндә аларга льгота бар. Биредә яшәүчеләр хезмәт хакына салымны эшләгән урыннарында калдырып кайталар.