Белгән дошманны җиңү җиңелрәк

Башта ук әйтеп куям, бу очракта “дошман” сүзе артында коррупцияне, билгеле инде аның артында торучыларны күз алдында тотам.

Татарстанда коррупция белән көрәшү сүздә генә бар­мавын республиканың сәяси, икътисадый, социаль-мәдәни тормышы белән таныш бул­ган һәркем ишетеп, укып тора. 2014-2020 елларга коррупция белән көрәшү буенча Дәүләт программасы кабул ителүе ха­кында да беләбез. Быел шушы программа нигезендә Татар­стан Республикасының со­циаль-экономик мониторинг буенча комитеты көнкүреш коррупциясен өйрәнү буенча тикшерү үткәргән. Сорашты­руда катнашучылар коррупция диюгә нәрсәне күздә тоталар соң? Взятка бирү – 68,7, эш уры­ныннан явызларча файдала­ну – 58,5, куркытып алу – 46,6, дәрәҗәле урыннарда утыручы­ларга бүләк китерү (бирү түгел) – 31,8, дәрәҗәле урыныңны һәм дәүләт акчасын шәхси мәнфәгатьләрдә куллану – 25,7 процент. Рәхмәт йөзеннән бүләк бирүне коррупция дип санамыйбыз. Чиновниклар бу өлкәдә фигурант булмасын өчен, хәтта бүләкнең нинди суммадан артмавы хакында регламент та бар. Шуңадыр да, республика, муниципаль берәмлекләрнең үсешенә нәрсә комачаулый, дигән сора­уга чиновниклар арасында “кор­рупция” дип 11 процент респон­дентлар гына җавап биргән, ә иң мөһимнәренә:

- товарларга югары бәяләр – 42,5;

- юлларның һәм күперләрнең начар булуы – 39,3;

- эшкә урнашу – 39,1;

- түбән хезмәт хакы, аны түләү буенча соңга калу – 26,1;

- экономик хәл начараю – 25,7;

- авыл хуҗалыгындагы проб- лемалар – 23,1;

- торак-коммуналь хуҗалы- гындагы проблемалар – 16.

Безнең районда да хезмәт ха­кын вакытында бирмәү очракла­ры элеккеге “Вамин”, хәзер “Сөт иле” агрофирмаларында булып тора. Сүз дә юк, “Вамин” бу­рычлары бүгенге җитәкчеләргә һаман да иркен яшәргә ирек бирми. Эш кешесенең монда ни гаебе бар соң?! Шул шартлар­да үз бурычларын үтәгән өчен аларга хөрмәттән башка сүз юк.

Газета битләрендә элек тә бәяләр хакында мәгълүмат би­реп бара идек. Алга таба “кул­ланучы почмагы” дигән рубрика астында бу темага тирәнтен һәм төрле яклап карый баш­лаячакбыз. Аеруча үзебезнең җитештерүчеләр – ит, сөт, яшелчә сатучыларның товар­ларын Минзәләдәге сәүдә челтәрләреннән эзләячәкбез.

Гомумән, коррупция хакында Татарстанда яшәүчеләрнең фи­керен өйрәнүгә багышланган сораштыру нәтиҗәләренә ка­бат әйләнеп кайтачакбыз әле.

Хөрмәтле укучыларыбыз, сезнең дә бу темага уйланула­рыгызны, конкрет фактлары­гызны көтәбез. Иң мөһиме, без дошманны ачыкларга өйрәнеп барабыз. Димәк, көрәшү дә җиңеләя барачак.

акцент

Сораштыруда катнашучы минзәләлеләр коррупцияне рай­онда проблема буларак билгеләп үтмәгәннәр. Әгерҗе райо­нында яшәүчеләрнең – 62,2, Югары Осланда – 46,7, Биекта­уда – 35,6 проценты коррупцияне проблема дип атый. Түбән Кама, Бөгелмә, Әлмәт, Кукмара, Казан, Чаллыда яшәүчеләр дә коррупциядән интегәләр икән.

Илдус ШАҺИЕВ