Беренче булып керештеләр

Гражданнарны авария хәлендәге торактан күчерү буенча 2013-2017 елларга исәпләнгән программа нигезендә безнең районда авария хәлендәге 35 йортны күчерү планлаштырыла, шул рәвешле 154 гаилә иске торактан яңасына күчереләчәк дигән сүз.

Республика буенча караганда, безнең район әлеге программа бу­енча төзелешкә беренчеләрдән бу­лып кереште. Минзәлә районында әлеге программа буенча 33 йорт төзелеше башланды, шуларның 21 е Садак бистәсендә. Бер фа­тирлы йортларның мәйданы – 60 кв. м, янәшәсендә җир участокла­ры да бар. Йортлар төзелә торган урамдагы юлга вак таш җәелгән, аннары асфальт салыначак. Якын­да гына республика программасы буенча быел салынган яңа балалар бакчасы, кибетләр дә ерак түгел. Объектларда хезмәт куючы под­ряд оешмаларының барысы да үзебезнекеләр. Төзелеш эшләренә параллель рәвештә су, газ кертү буенча да әзерлек эшләре алып ба­рыла.

Гражданнарны авария хәлендәге торактан күчерү программа­сы нигезендә йортлар төзүгә иң беренчеләрдән булып Егор Юдин, Язкәр Биҗанов, Николай Секунов, Марат Мәүләтов җитәкчелегендәге төзелеш оешмалары керештеләр, болардан тыш әлеге программа буенча йортлар төзүдә Фаил Са­биров, Олег Ильин, Владимир По­пов җитәкчелегендәге подряд оешмалары да эшли. Шунысы бар, төзелеш эшләре әлегә подрядчы­лар исәбенә башкарыла, төзелеш эшләренә акча күчерелсә, эш тем­пы артыр иде, дип подрядчыларның гозерләре әйтелде. Район башкарма комитеты җитәкчесе Илгизәр Шагали­ев әлеге программа буенча берничә этаптан торган эшләрне чагылдыручы юл картасы бул­дырылуы турында сөйләде:

– I этап – тузган торакта яшәүчеләрне программада катнашу шартларын аңлату; II этап – мәгълүматлар туплау (документлар әзерләү, торак хуҗаларыннан торак сатып алу­га килешүләр төзү һ.б.; III этап – мәгълүматларны ГЖФ систе­масына кертү; IV этап – про­ектлаштыру, төзелеш эшләре, гражданнарга фатирлар бирү). Без әлеге юл картасының дүртенче этабында, – диде ул.

Район башкарма комитеты җитәкчесенең инфраструктура­ны үстерү һәм инвестицияләр буенча урынбасары Вәсил Гыйләҗетдинов программа­ны тормышка ашыруның һәр этабына тукталды. Бигрәк тә икенче этапта документлар ту­плау мәшәкатьле эш. Теге яки бу йортта кайбер фатирлар хосусыйлаштырылган булып та, кайберләрендә ул башка­рылмаган икән, бу да эш ба­рышын тоткарлый. Безнең районда 2013 ел буенча фатир хуҗаларыннан торак сатып алу буенча 65 килешү төзелсә, быел 50 килешү төзелгән. Республика буенча алганда, әлеге күрсәткеч әйбәт санала. Минзәләлеләр документлар рәсмиләштерү процедурасын җиңеләйтү өчен ГЖФ вәкилен үзләрендә булдыру үтенечен белдерделәр.

Программаны тормышка ашыру барышында теге яки бу фатирда балигъ булмаганнар яшәве белән бәйле кыенлыклар килеп чыгуы, кайберәүләрне бәяләр аермасын каплау са­гайтуы турында әйтелде. Шуңа күрә гражданнарны авария хәлендәге торактан күчерү про­граммасын тормышка ашырган­да җир һәм торак мәсьәләләрен юридик яктан төгәллек белән башкарырга кирәклеге ассы­зыкланды. ГЖФ җитәкчесе Тәлгать Абдуллин төгәл карар кабул итәргә кирәклеге турын­да фикерен җиткерде: авария хәлендә тормасын өчен йорт­ка яисә капремонт ясалырга, яисә сүтеп, анда яшәүчеләр яңа фатирларга күчерелергә тиеш. Гражданнарга шушы программадан файдаланып калырга мөмкинлек барлы­гын аңлатырга кирәк, диелде киңәшмәдә.

Авария хәлендәге торакның 1 квадрат метрын дәүләт 11022 сумнан сатып ала. Яңа торакның 1 кв.метрына 28 500 сум түләргә кирәк. Бәяләрдәге аерманы түли алмаучыларга социаль ипотека шартларында яңа фатир алу тәкъдим ителә. Әлеге программаның тагын бер уңай ягы – бәяләрдәге аер­маны 15 ел дәвамында түләү мөмкинлеге бирелү. Торак бәясен түли алмаган очракта найм буенча яшәргә була.

– Быел авария хәлендәге 24 йортта яшәүче 103 гаилә яңа торак алырга билгеләнде. Алар белән социаль ипотека буенча торак алуга килешүләр төзелде. Әлеге гаиләләрне булачак фа­тирларына беркетү төгәлләнде, – диде Вәсил Гыйләҗетдинов.

2014-2015 елларда ава­рия хәлендәге түбәндәге йортларда яшәүчеләрне күчерү планлаштырыла:

Шәһәр буенча

М.Җәлил урамы, 55;

К.Либкнехт урамы, 101;

К.Либкнехт урамы, 90;

М.Җәлил урамы, 63;

Татарстан урамы, 5;

Тукай урамы, 6;

Чапаев урамы, 8;

Элеваторная урамы, 6;

Северная урамы, 11; 17;

К.Маркс урамы, 158;

Ленин урамы, 46;

Головин урамы, 19;

Гурьянов урамы, 36;

Коммунистическая урамы,61;

М.Җәлил урамы, 80;

Р.Люксембург урамы, 43;

О.Кошевой урамы, 3 нче, 5 нче, 7 нче йортлар.

Авыллар буенча

Юртау бистәсе, Солнечная урамы, 8;

Николаевка авылы, Мирная урамы, 66;

Яңа Маҗын авылы, Моло­дежная урамы, 13, 15.

Флүрә МУСИНА