Көзге муллык чагылды

Шәһәребезнең Октябрь мәйданында районда барган өлкәннәр ункөнлеге уңаеннан оештырылган ярминкәдә көзге муллык сизелеп торды.

 Ярминкәләргә йөри-йөри активлашып, оста­рып беткән, үзләренең авыл җирлекләреннән ит, сөт кебек авыл хуҗалыгы продукцияләре, авыл халкының шәхси хуҗалыгында үстерелгән кош-кортын, бакча нигъмәтләрен алып килеп сатуны оештыручылар бу юлы бик канәгать калулары турында гәп кордылар.

“Сөт иле-Минзәлә” фи­лиалы тәкъдим иткән катнаш азыкны бик тиз алып бетерделәр, бо­дай, арыш алучылар да, арпа, солы алыр идем диючеләр дә булды. Кадрәктән килүчеләр сөт өсте, эремчек, чәк-чәк әйбәт сатылды, дисә, Во­ровский исемендәге авыл җирлегеннән килүчеләр кош-корт итеннән тыш, кабакны әйбәт алдылар, икенче юлы күбрәк алып килербез, дип киләсе ярминкә турында кайгырт­тылар. Ярминкәнең үзенә килсәк, шәһәр халкы ит, сөт, бал, балык, йомырка, эремчек, кош-корт итләре алып кинәнде, кышкылык­ка бәрәңгесен, кишерен, суганын туплап куйды, чәй табынына пешкән камыр ризыклары алды. Минзәлә урманчылыгы сату итәргә хәтта ярылган утын алып чыккан иде. Ярминкәне ка­рап, биредә сәүдәгәрлек итүчеләрнең хәлләрен бе­лешеп йөргән район баш­лыгы

 Айдар Салахов мон­дый ярминкәләрнең Яңа елларга кадәр әледән-әле үткәрелеп торылачагын әйтте.

Галия Сәлимова, пен­сионер:

– Ярминкәләрне көтеп алам. Нәрсә алачагым­ны алдан ук уйлап куям. Гаиләм зур түгел, 5 ки­лодан артык ит алдым, өлкәннәргә күрсәтелгән игътибар дип кабул ит­тем – килосын 200 сум­нан саттылар, «Вахитов» хуҗалыгыныкы, диделәр, ите бик әйбәт күренә,

Владимир Смирнов, пенсионер:

– Без гаиләбез белән эре терлек асрыйбыз, шуңа күрә ярминкәдән бодай, катнаш азык алучан. Чул­манлылардан 850 сумнан 1 центнер катнаш азык, 800 сумнан 2 центнер бодай алдык. Солы да кирәк иде, анысы юк икән.

Людмила Никонорова, хезмәт ветераны:

– Әйбер мул, ни алыйм дисәң, шул бар. Кош-кортка дип бераз бодай, кышлык бәрәңге алып куйдык. Ки­шере дә бик әйбәт күренә, анысын да алмый булмас.

Лилия Галимова, пен­сионер:

– Ярминкәдән балык ал­мый калган юк, бу юлы да алдык. Сөт өсте дә базар­дагыдан очсызрак, 100 сум­га алдым. Күптән күрмәгән таныш-белешләрне очрат­тым, кәефем бик әйбәт.

 безнең өстәмә

Менә шундый бәйрәм рухында, күтәренке кәеф белән Минзәлә район хуҗалыклары, авыл җирлекләре һәм шәхси эшмәкәрләр 5 октябрьдә Яр Чаллы шәһәрендә дә үзләренә махсус билгеләнгән урында – “Южный” агропромпаркы сәүдә мәйданында ярминкә оештырдылар (мондый ярминкәнең чи­раттагысы 18 октябрьдә була).

Минзәлә ярминкәсенең үз йөзе сизелеп, күренеп торсын дип, район башлыгы Айдар Салахов ярминкәне оештыручыларга таләпләр куйды. «Продукциянең киң ассортименты булыр­га, тиешле санитария кагыйдәләрен истә тотарга, чисталык-пөхтәлек үтәлергә, электрон үлчәүләр, палатка-өстәлләр булдырырга, сатып алучыларны җәлеп итәрлек зәвык белән эшләнгән вывескалар куелырга тиеш», дип киңәш иткән иде Айдар Фәслахович.

Чаллыда оештырылган ярминкәдә минзәләлеләр бу көнне 32 ноктада сату итте. Биредә район башлыгы Айдар Салахов, район башкарма комитеты җитәкчесе Илгизәр Шагалиев, «Та­треспотребсоюз» генераль директоры Мәхмүт Фәттахов кат­нашындагы делегация ярминкә белән танышып чыкты, сатып алучылар белән гәп корды. Мондагы ярминкәдә бигрәк тә «Дәүләтов» КФХсының бәрәңгесе, кишере (1 кг сы 15 сумнан), хуҗалыкларның сыер ите әйбәт сатылды. «Муллахмәтов» КФХсы үзләре алып барган 320 литр сөтен (1 литры 30 сумнан) сатып бетерде.