Күңел тынычлыгы эзләп

Үзәкләштерелгән китапханәдә Чаллы шәһәрендә яшәп иҗат итүче, әсәрләрен халык яратып өлгергән, үз иткән язучы Зифа Кадырова һәм шагыйрә Әлфия Ситдыйкова белән очрашу узды.

Очрашуны үзәкләштерелгән китапханә директоры Әлфия Нәбиева ачып җибәрде, авторлар хакында кыскача мәгълүмат бирде.

Күпләребезгә “Күңел” радио­сы аша, берничә котлау шигырь җыентыклары белән таныш булган Әлфия Ситдыйкова чыгышының башында ук Украина темасын куз­гатты, җәлилчеләрне искә алып, аларның җәзалап үтерелүенә 75 ел тулу уңаеннан язылган шигырен укыды. Әлфия ханым үз авылы та­рихын язуын, авылдан сөрелгән гаиләләр язмышы белән кызыксы­нуын әйтеп узды. Болардан тыш аның балалар өчен 40 тан артык китабы дөнья күргән, күбесе рус теленә тәрҗемә ителгән. Рәдиф Гаташны ул “шигъри остазым” дип атый.

Китап укучылар арасыннан Лени­за апа Якиева шагыйрәнең иҗатына югары бәя биреп, күңеленә хуш килгән юлларны укып күрсәтте.

“Әлфия булмаса, мин кем булыр идем?” – дип башлады үзенең чы­гышын Зифа Кадырова. Әле танылу алмаган Зифа Кадырова белән ра­дио аша интервью әзерләгән икән ул. Ике иҗат кешесе бергәләп очра­шуларга йөриләр, быел гына да 22 очрашу узган. Зифа ханым бүгенге вәзгыятькә, яшьләр тормышына, катнаш никахлар темасына кагы­лышлы сорауларга җавап бирде, һәрнәрсәгә үз фикерен белдерде.

Зифа Кадырованың теле гади, аңлаешлы. Кайсы гына әсәрен укысаң да, сюжетларның байлы­гы белән очрашасың. Әсәрләре укучыда кызыксыну уята. Укып бе­терми, һич туктармын димә. Зифа Әбделвәли кызы Кадыйрова бер дә көтмәгәндә үзенең өч китабы белән (“Язмыш сынавы”, “Сагынырсың – мин булмам”, “Көтеп узган го­мер”) әдәбият мәйданына дәррәү килеп кереп, китап сөючеләрнең мәхәббәтен яулап өлгерде. Ул 1958 елның 7 октябрендә Баш­кортстан Республикасының Учалы районы Ахун авылында туа. 1978 елда Чаллы шәһәренә төзелешкә килә, һөнәре буенча – электромон­тажчы. Зифа ханым ире Марсель белән бер ул, бер кыз тәрбияләп үстерәләр. “Гомеремнең бик авыр бер мизгелендә кичен, күңел ты­нычлыгы эзләп, кулыма каләм белән дәфтәр алдым”, – дип сөйли Зифа ханым үзенең ничек әсәрләр яза башлавын искә төшереп. Бе­ренче китабын ул ике ай эчендә тәмамлый да. Китап дөньяга чы­гып, бер атна да үтми, китап кибетләренә аларны сорап керә башлыйлар.

Зифа ханым – бәхетле автор. Чөнки аның язган һәр повестен татар телендә сөйләшүче бөтен Россия халкы яратып укый. Моны дәлилләп, шуны әйтәсе килә, республика күләмендә Зифа Кадыйрованың “Язмыш сынавы» китабы 2009 елда “Иң күп укылучы” китаплар арасында икенче урынны яулаган, ә автор үзе исә Башкорт­станда татар телендә чыгып килүче “Кызыл таң” газетасының лауреаты” дигән мактаулы исемгә лаек булган.

“Сагынырсың – мин булмам” по­весте беренче тапкыр 2009 елда “Мәйдан” журналында басылып чыга. Әсәрдә төп вакыйгалар тас­вирланган урын итеп Зифа Кадый­рова үзенең туган авылын ала. “Ахуннар көчле, горур халык”, – дип, авылдашларына мәдхия җырлый. Бу урында шуны да әйтеп үтәсе килә: Зифа Кадырова, күпсанлы сорауларга җавап йөзеннән, бу китапның русчасын да чыгарырга өлгергән. “Сумбуль” дип атала ул.

Кунаклар бик аралашучан, һәрбер гамәлгә аларның үз карашы, үз фи­кере бар. Ике сәгатьтән артык бар­ган очрашуда халык авторларны тын да алмый тыңлады. Киләчәктә авторларның, берсеннән-берсе мавыктыргыч, кызыклы темаларны күтәреп, төрледән-төрле исемнәр астында шигырь-поэмаларын, по­весть-романнарын укырга язсын дигән теләктә һәм кабат очрашулар өмет итеп калды килгән халык. Ике автор бер-берсен тулыландырып торды.

Очрашуга Хуҗәмәт авылыннан килгән Рәйсә апа Зарипова ку- накларга күчтәнәч – чәк-чәк алып килгән, ул авторларга рәхмәт әйтеп, җылы теләкләрен җиткерде. Кичә соңында күпләр авторларның ки­тапларын сатып алу һәм аларга автографын куйдыру бәхетенә дә иреште.

Әлфинә ВОРОБЬЕВА