Техникумда акча эшләргә өйрәнәчәкләр
Шәһәребезнең Минзәлә авыл хуҗалыгы техникумында да капиталь ремонттан соң яңа уку елы гадәттәгечә 1 сентябрь көнне башланып китте.
Авыл хуҗалыгына бел- гечләр әзерләү техникумына студентларны Белем бәйрәме белән тәбрикләргә район башлыгы Айдар Салахов һәм ТР авыл хуҗалыгы һәм азык- төлек министрының терлекчелек буенча урынбасары Нәҗип Хаҗипов, район авыл хуҗалыгы һәм азык- төлек идарәсе начальнигы Юрий Исламов, район ветеринария берләшмәсе җитәкчесе Светлана Панкова, дәүләт нәсел предприятиесе начальнигы Евгений Куприянов, элек техникумда укыткан ветеран укытучылар да килгән иде. Техникум директоры Эльвира Фаттахова студентларны Белем бәйрәме белән тәбрикләде. Аннары Айдар Салахов сүз алды: – Авыл хуҗалыгы техникумы зооветеринария, нәсел эше кадрлары әзерләү буенча ресурс үзәге булачак, мондый уку үзәге республика күләмендә алдынгы булырга тиеш, чөнки монда уку һәм яшәү өчен бөтен шартлар тудырылган. Ул килгән халыкны Белем бәйрәме белән тәбрикләде. Нәҗип Хаҗипов үз чыгышында техникумда соңгы елда зур төзелеш эшләре башкарылуын билгеләп үтте, һәр елны үзгәрешләр кертелүен, ул бу уку йортында укучыларның бөтен төр юнәлешләрдә дә белем дәрәҗәсе югары уку йортларында укучы студентлардан түбән булмаска тиешлегенә, киләчәгегез шушы уку йортыннан башлана, авыл хуҗалыгы үстерү программасында катнашып, акча эшләргә кирәклеген ассызыклады. Аннары техникум җитәкчелеге яхшы укыган, иҗтимагый эшләрендә актив катнашкан, шулай ук урып-җыю эшендә эшләгән бер төркем студентларга Мактау кәгазьләре, Рәхмәт хатлары һәм акчалата премияләр тапшырды.
безнең белешмә
Быел авыл хуҗалыгы техникумына барлыгы 92 студент кабул ителде, аларның барысы да диярлек техникумның тулай торагына урнаштырылды.
Дилфас ГАЛИЕВ