Халык гозерен тыңларга!
Әлеге шигарь астында республика күләмендә халык җыеннары уздырылу дәвам итә. Чираттагысы Матвеевка һәм Николаевка авыл җирлекләрендә узды.
Халык җыеннарында җирлек проблемалары һәм төрле мәсьәләләр күтәрелә. Матвеевка авылы кешеләренең гозерен тыңларга һәм аларны киләчәктәге эш планнарына теркәп куярга район башлыгы Айдар Салахов, ТР Дәүләт Советы депутаты Алмаз Шәрипов, ТР Халыклар Дуслыгы йорты директоры Ирек Шәрипов килгәннәр иде.
Район башлыгы җыенда катнашучыларны кыскача гына район тормышы, гамәлдәге программалар белән таныштырды. Шулай ук үз чыгышында бу авылда башкарылган эшләргә дә тукталды. ТР Дәүләт Советы депутаты Алмаз Шәрипов үз алдына “Минзәлә халкына хезмәт итәргә” дигән бурыч куя. Моны ул үз эш-гамәлләре белән дәлилли дә. Ул безнең районга килгәнче якынча 15 мең гектар җир эшкәртелмичә ята иде, ә хәзер хәл чагыштырмача үзгәрде. Алмаз Хантимерович матвеевкалыларга борчыган мәсьәләләре булса, аларны үзенең электрон адресына юл ларга киңәш итте, аларны игътибарсыз калдырмаячагын белдерде. ТР Халык-лар Дуслыгы йорты директоры үз чыгышында милли сәясәт һәм милләтара мөнәсәбәтләр хакында бәян итте. Кунаклар гомер буе авылда хезмәт куйган Шакировлар гаиләсенә бүләк тапшырдылар.
Матвеевкалылар, үз чиратында, борчыган сорауларын әзерләп куйганнар иде. Бу – юллар төзелеше, урамнар яктыртылуы һәм башка шундый мөһим мәсьәләләр. Авыл кешеләре җитәкчелеккә сораулар биреп кенә калмыйча, башкарылган эшләр өчен рәхмәт тә белдерделәр.
Николаевка авыл җирлегендә узган җыенда да шәхси сораулар яңгырамады диярлек, күбесе авыл тормышы хакында иде. Чулпан авылына кадәрге өлештә һәм Николаевка авылы эчендә юллар төзү, Николаевка, Үртамак, Чулпан, Рус Каран авыллары урамнарын электр белән яктырту мәсьәләләре яңгырады җыенда.
Монда да иң яхшы гаиләләр- не тәбрикләү булды. Тырыш хезмәтләре өчен алдынгы сыер савучылар Ольга Титова (уңдагы рәсемдә һәм Эльвира Насыйровага бүләкләр тапшырылды. Әлеге гаиләләр авылдашлары өчен үрнәк булып торалар. Эльвира һәм Александр Насыйровлар 4 бала тәрбияләп үстерәләр, авылда яшәргә яхшы шартлар тудырылган өчен район һәм дәүләт җитәкчелегенә рәхмәтле алар. “Авылда мәктәп, балалар бакчасы бар, эш белән тәэмин ителгәнбез, хезмәт хакыбыз да тотрыклы. Боларның барысы да президентыбыз Рөстәм Миңнехановның тырышлыгы нәтиҗәсендә”, – ди Ольга Титова. Ул ире белән өч бала тәрбияләп үстерә һәм авылда тулы тормыш белән яшәү өчен барлык шартлар да тудырылган дип саный.