Микрорайон «вожак»лары

Күптән түгел Минзәлә шәһәр Советы утырышында территориаль җәмәгать үзидарәсе (ТОС) оештыру турындагы мәсьәлә каралды.

Җәмәгать үзидарәсе оешты­ру идеясе шәһәребездә яшәүче бер төркем гражданнарның инициативасы буенча барлыкка килгән. Шәһәр Советы утыры­шында ТОС оештыру тәртибе турында положение расланган. Бүгенге көндә моның буенча әзерлек эшләре бара. Терри­ториаль җәмәгать үзидарәләре территорияләренең чикләре билгеләнгән, моның өчен шәһәр территориясен 5 өлешкә бүлеп, Северный, Театральный, Изыскательләр, Центральный, Больничный участоклары бу­енча җәмәгать үзидарәләре булдырыла. Халык саны ягыннан караганда, аларның һәркайсында 2 меңнән алып 3 мең кешегә кадәр исәпләнә.

– Һәрберсендә бер җаваплы вәкил сайлап куелачак, әлеге кандидатураларны барлап куйдык инде. Шушы араларда алар халыкка хезмәт күрсәтү службалары җитәкчеләре белән берлектә әлеге җәмәгать үзидарәләренең эш планын төзиячәкләр, 1 сентябрьдән алар үзләренең эшчәнлекләрен башлап җибәрәчәкләр, – диде безгә шәһәр башлыгы урынба­сары Елена Сысоева.

Территориаль җәмәгать үзидарәләре халык белән эшләү, мәдәни-ял чаралары оештыру, яшәгән урыннар­ны төзекләндерү һ.б. шәһәр тормышына кагылышлы мәсьәләләрне хәл итүне күздә тота. Шуңа күрә җәмәгать үзидарәсе “вожаклары” үз уча­стокларында иҗтимагый про­блемаларны чишүдә, микрорай­оннарда мәдәни, массакүләм чараларны оештыру һәм үткәрүдә активлык күрсәтерләр дип көтелә.

безнең өстәмә

Мондый ТОСлар республикабызның Ленино­горск, Чистай шәһәрләрендә күптәннән эшләп килә. Алар башта җәмәгать башлангы­чы буларак яшәп килсә, то­ра-бара алар бюджеттан фи­нанслана башлаган. Минзәлә шәһәре территориаль җәмәгать үзидарәләренең эшчәнлеген координацияләү өчен коммерцияле булмаган фонд оештыру күздә тотыла.

Флүрә МУСИНА