"Кечкенә дуслар өчен зур бәйрәм"
"Татарстанда җәй» проекты кысаларында Халыкара балаларны яклау көнендә Минзәлә шәһәрендәге М.Җәлил исемендәге паркта «Кечкенә дуслар өчен олы бәйрәм» исемле бәйрәм чарасы булды.
Бу көн - балалар өчен гади шатлык бәйрәме генә түгел. Ул зурларга балалар турында даими кайгыру һәм саклау кирәклеген һәм алар өчен җаваплылык йөкләвебезне искә төшерә. Һәр бала бәхетле һәм тулы канлы балачак хокукына ия.
Җылы җәйнең беренче көнендә паркта балалар, әбиләр, бабайлар, дуслар һәм туганнар белән бергә җыелдылар.
Бар халыкны бәйрәм белән район Башкарма комитеты җитәкчесе урынбасары Нэля Габдулла кызы Бикеева котлады.
Бәйрәм кунаклары өчен концерт программасы оештырылды, анда балалар бакчаларында тәрбияләнүчеләр, сәнгать мәктәбе, «Нотка» һәм «Светлячки» вокаль ансамбльләре, «Септима» ВИА чыгыш ясады. Мәйданчыкта уеннар, күңел ачулар үткәрелде, аттракционнар эшләде.
Шат бала йөзләре һәм күңелле көлүләр — бәйрәмнең уңышлы узганына иң яхшы дәлил.