Хәзер татарстанлылар телефон номеры буенча посылкалар җибәрә һәм ала ала.
Почта адресатның телефон номеры буенча посылкалар җибәрергә мөмкинлек бирүче яңа хезмәтне эшләтеп җибәрде. Җибәрүчегә инде төгәл адресны яки алучының тулы исемен күрсәтү кирәк түгел.
Онлайн рәсмиләштергәндә, адресатның телефон номерын халыкара форматта кертү җитә. Почта бүлекчәсеннән җибәргәндә, аны Почта хезмәткәренә генә әйтергә кирәк.
Адресат посылканы ала алсын өчен, ул телефон номеры буенча китерү хезмәтенә тоташуны расларга тиеш. Бу эшне сайтта яки Почта мобиль кушымтасында теркәлеп башкарырга мөмкин. Әгәр кулланучыда инде гади электрон имза бар икән, тоташу шунда ук башкарылачак. Дәүләт хезмәтләре порталы аша имзаны җиңел генә рәсмиләштерергә мөмкин.
Мондый посылка таләп буенча адресланачак. Тоташтыру һәм хезмәт үзе бушлай, клиент бары тик стандарт китерү тарифларын гына түли. Алыучыга трек-номер автоматик рәвештә күренәчәк. Посылканы адресат профилендә күрсәтелгән адреска бәйле почта бүлегеннән алырга мөмкин.
«Посылка җибәрү процессы җиңелрәк һәм тизрәк булды. Клиентларга адрес һәм алучы исемен тулысынча кертергә кирәкми. Элек җибәрүчеләр адресны ялгыш кертә ала иде, ә дөрес индексны табу күп вакыт ала иде. Хәзер онлайн-сервисларда шәхси идентификатор булып мобиль телефон тора — бу уңайлы, заманча һәм популяр. Безнең бурыч — клиентлар өчен Почта белән эшләүне уңайлы итү өчен цифрлы проектларны үстерү», — дип билгеләп үтте Россия Почтасының генераль директор урынбасары Максим Цыпин.