Әлфия Когогина: Иң яхшы инвестицияләр – безнең балаларга һәм яшьләргә инвестицияләр!
Партия десанты составында Россия Федерациясе Дәүләт Думасы депутаты Әлфия Когогина, Татарстан Республикасы Дәүләт Советы депутаты Яр Чаллыдан Владимир Чагин, Шәһәр Советы депутаты Эдуард Панфилов, Яр Чаллының Үзәк районы башлыгы Фидәрис Хәбибуллин һәм «Бердәм Россия» җирле бүлекчәсе активы Яр Чаллы политехник көллиятенең тулай торагында капиталь ремонт барышы белән танышты.
«Иң яхшы инвестицияләр – безнең балаларга һәм яшьләргә инвестицияләр икәнен кабатлап туймыйм! Үткәрелгән эшләр нәтиҗәсендә безгә авария хәлендә булган мәйданнарны кулланып, тулай торакта яшәүчеләр санын 100 урынга арттырып, 460 урынга җиткерү мөмкинлеге тудырылачак», – дип шәрехләде Когогина.
Яр Чаллы политехник көллияте үз тарихын 1981 елдан, шәһәрдә Техник училище ачылган вакыттан башлап алып бара. Бүгенге көндә уку йорты Татарстан Республикасы һөнәри белем бирү ресурс үзәге статусына ия. Федераль «Профессионалитет» проекты кысаларында көллият белем бирү-җитештерү кластерының үзәге булып тора.
Ике тугыз катлы йортның берсендә эшләр инде тәмамланган, икенче блокны ремонтлау агымдагы ел ахырына кадәр дәвам итәчәк. Бүлмәләр һәм подъездларны бизәү эшләре, тәрәзәләр, ишекләр урнаштыру, электр монтажлау эшләре, зәгыйфь токлы челтәрләр урнаштыру, вентиляция һәм керү төркемен җиһазлау эшләре алып барыла. Федераль һәм республика бюджетларыннан 270 миллион сумнан артык акча бүлеп бирелгән.
2025 елда башланган студентлар тулай торакларын капиталь ремонтлау федераль программасы, Россия Президентының 2030 елга кадәр 800 университет тулай торагын модернизацияләү буенча күрсәтмәсен үтәү максатыннан, "Яшьләр һәм балалар" милли проекты кысаларында гамәлгә ашырыла. 2025 елда беренче дулкын кысаларында 31 тулай торак ремонтланган – бу студентлар өчен 13,3 меңнән артык урын. 2026-2028 елларда ремонтланырга планлаштырылган тулай тораклар саны бөтен ил буенча 280 бина тәшкил итә – 120 мең студент өчен.