Татарстан икътисадына сәнәгатьне үстерү өчен 95 миллиард сумнан артык акча җәлеп ителгән.
Дәүләт Думасының кече һәм урта эшмәкәрлек буенча комитеты рәисенең беренче урынбасары, «Бердәм Россия» партиясенең «Эшмәкәрлек» проектының федераль координаторы Альфия Когогина рәислегендә Татарстан Республикасы икътисадына федераль акчалар җәлеп итү һәм сәнәгать өлкәсендә дәүләт программаларын гамәлгә ашыру буенча эшче төркем утырышы узды.
«Безнең эшче төркем утырышларын, Минпромторг белән уртак карарыбыз буенча, һәрвакыт җирдә, чын җитештерүләрдә, республика шәһәрләрендә һәм районнарында үткәрәбез. Бу якын килүнең нинди яхшы ягы бар? Берсүзсез, киңәшмәдән тыш, сәнәгать мәйданчыкларын, индустриаль паркларны, төп тармаклар өчен белгечләр әзерләү өлкәсендәге уку йортларын да карыйбыз», – дип шәрехләде Когогина.
Бу юлы чара үткәрү мәйданы итеп Түбән Кама һәм шәһәрнең сәнәгать предприятиеләре сайланды. Җыелышта катнашучылар «СИБУРИНТЕХ-НК» инженер-техник экспертиза үсеш үзәге, Түбән Кама химия-технология институты, шулай ук «Түбән Кама» промпарк резидентлары белән таныштылар, алар арасында электротехник җиһазлар җитештерүче кечкенә технологик компания – «Питон Кама» ҖЧҖ һәм сәнәгать суыткыч һәм вентиляция җиһазлары җитештерүче «СОВИТАЛ» ҖЧҖ бар.
«Сәнәгать предприятиеләре җитәкчелеге, эшмәкәрләр, югары уку йортлары вәкилләре белән тере аралашу – дәүләт сәнәгать сәясәтен урыннарда гамәлгә ашыру мәсьәләләре буенча кире элемтә алу өчен искиткеч мөмкинлек», – дип билгеләп үтте депутат.
Утырыш барышында сәнәгать үсешенең дәүләт программалары буенча эшнең агымдагы нәтиҗәләре тикшерелде.
«2025 елның 9 аенда республика икътисадына 94 миллиард сумнан артык федераль акча җәлеп ителде. Аерым алганда, Татарстан предприятиеләре индустриаль парклар үсешенә чыгымнарны компенсацияләү, НИОКР һ.б. өчен 86 миллиард сум максатчан субсидияләр, шулай ук Сәнәгать үсеш фондының 8 миллиард сум ташламалы займнар алды», – дип хәбәр итте Татарстан сәнәгать һәм сәүдә министрының беренче урынбасары Родион Карпов.
Җыелыш эшендә шулай ук Түбән Кама районы башлыгы урынбасары Ленар Әхмәтов, ТР Инвестиция венчур фонды вәкилләре, республика сәнәгать предприятиеләре катнашты.