Әлфия Когогина «Әни-эшмәкәр» проекты җиңүчеләрен котлады.
Мәскәүдә «Әни-эшмәкәр» хатын-кызлар эшмәкәрлеген үстерү һәм ярдәм итү программасының федераль финалы узды.
Жюри составына РФ Дәүләт Думасы депутаты, «Бердәм Россия» партиясенең «Эшмәкәрлек» проекты федераль координаторы Әлфия Когогина керде.
«Бөтен илдән яшь әниләр белән аралашу минем өчен һәрвакыт күңелле вакыйга, әгәр алар тагын да батыр, креатив эшмәкәрләр булса – бу искиткеч!» – дип шәрехләде парламентарий.
«68 төбәк этабы җиңүчеләреннән финалга 25 кыз чыкты, ә иң яхшылары җиңүче булып, грантлар һәм бүләкләр алды. Ләкин минем өчен, сез барыгыз да Йолдызлар! Һәрберегез мине илһамландыра! Батыр булыгыз!» – дип мөрәҗәгать итте Когогина проект катнашучыларына.
«Әни-эшмәкәр» – хатын-кызлар эшмәкәрлегенә ярдәм итүгә юнәлдерелгән «Нәтиҗәле һәм көндәшлек икътисады» илкүләм проектының инструменты.
Программада балигъ булмаган балалар тәрбияләүче, шулай ук декретта булган хатын-кызлар катнаша ала.
Программа берничә этапта тормышка ашырыла. Төбәк этабында катнашучылар эшмәкәрлек нигезләре буенча укулар уза, үз бизнес-идеяләрен эшкәртә, аларны эксперт жюри алдында яклый. Иң яхшы проектлар 150 мең сум күләмендә грантлар һәм үз бизнесларын үстерү өчен башка ярдәм ала.
Программаның федераль этабы Мәскәүдә Әниләр көне алдыннан узды. Яклау нәтиҗәләре буенча иң яхшы бизнес-идеяләр билгеләнде.
Җиңүчеләр 1 миллион, 500 мең һәм 250 мең сум күләмендә грантлар алдылар. Беренче урынны Самара өлкәсеннән Екатерина Рожкова «NIKOLA KIDS» проекты белән сәламәтлек мөмкинлекләре чикләнгән кешеләр өчен адаптив киемнәр булдыру буенча алды. Икенче урынны Оренбург өлкәсеннән Наталья Стрижова мәчеләр өчен «Астра» тузансыз тутыргыч җитештерү проекты белән алды. Өченче урынны Краснодар краеннан Ольга Переходцева балаларда техник һәм табигый-фәнни фикерләүне үстерү буенча «Компьютер спорты һәм дроннар белән идарә итү» проекты белән алды.