Минзәлә районы башлыгы эшмәкәрләр белән очрашты.
Район башлыгы районда гамәлгә ашырыла торган дәүләт программалары, киләчәккә планнар турында сөйләде. Бизнесны законга ярашлы алып баруның, салымнарны вакытында түләүнең мөһимлеген искә төшерде. Аның сүзләренә караганда, эшмәкәрләр белән мондый рәсми булмаган шартларда очрашулар даими үткәреләчәк. Район башлыгы махсус хәрби операциядә катнашучыларга ярдәм итүдә эшмәкәрләрнең өлешен дә билгеләп үтте.
Район башкарма комитеты җитәкчесенең икътисад буенча урынбасары Айгөл Гатина эшмәкәрләргә мөһим мәсьәләләрне хәл итүдә даими ярдәм күрсәтергә әзер булуын белдерде. Шулай ук ул очрашуга килгәннәргә кечкенә сувенирлар — агачтан ясалган һәм социаль челтәрләрдә икътисад бүлеге ресурсларының qr-кодлары белән телефон өчен тоткычлар бүләк итте.
Бизнеска ярдәм чаралары турында безнең якташыбыз, Яр Чаллыда үз эшчәнлеген алып баручы эксперт Эльвира Фассахова сөйләде. Районда өстәмә офис җитәкчесе Эльвира Юнусова «АК БАРС Банка»ның банк продуктлары белән таныштырды.
Рәсми өлештән соң очрашу рәсми булмаган шартларда чәй өстәле артында дәвам итте.