Татарстан Рәисе Рөстәм Миңнеханов һәм ТР авыл хуҗалыгы министры Марат Җәббаров Минзәлә районында булды.
Минзәлә районының зур инвесторы булган Коноваловка терлекчелек комплексы территориясендә "Камский Бекон" компаниясе белән Рөстәм Миңнехановның район активы белән очрашуы узды. Очрашуда оешмалар һәм учреждениеләр җитәкчеләре, район хуҗалыклары, авыл җирлекләре башлыклары, «Камский Бекон» предприятиесе хезмәткәрләре, Минзәлә авыл хуҗалыгы техникумы студентлары катнашты.
Очрашу башланганчы, «Камский Бекон» генераль директоры Ленар Сәлахов яңа биналарның берсендә хуҗалыкның киләчәккә планнары турында презентация тәкъдим итте. Монда Минзәлә авыл хуҗалыгы техникумы базасында Цифрлы технологияләр факультетының күптән көтелгән проекты хуплау алды — республика хөкүмәте аның бинасын ремонтлауга акча бүлеп бирәчәк. Район ветеринария берләшмәсенең бинасын ремонтлау һәм матди-техник базасын ныгыту өчен финанслау арттырылачагы билгеле булды.
Очрашу барышында, ашлык киптерү урынында узган очрашуда, район башлыгы Айдар Сәлахов бүгенге социаль-икътисади хәл белән таныштырды һәм алдагы үсеш планнары турында сөйләде. Дәүләт программалары кысаларында юллар, су белән тәэмин итү һәм канализация челтәрләре яңартыла һәм төзелә, ишегаллары, социаль объектлар төзекләндерелә. "Камский Бекон", "Август-Мензеля", "Калмурзино" агрофирмалары мисалында район икътисадына уңай йогынты ясавын, аерым алганда НДФЛ салымнары түләү, хуҗалыклар, оешмалар, предприятиеләр тарафыннан эш урыннары булдыруны ассызыклады. Район башлыгы бүген Садак авылында төзелеп килүче мәктәпнең район өчен күптән көтелгән булуын билгеләп үтте. Республика җитәкчелегенә башкарылган эшләрдә ярдәм күрсәткән өчен рәхмәт белдерде.
ТР Премьер-министры урынбасары — ТР Авыл хуҗалыгы һәм азык-төлек министры Марат Җәббаров һәм ТР Рәисе Администрациясе җитәкчесенең беренче урынбасары — ТР Рәисенең территорияләр белән эшләү идарәсе башлыгы Илнур Гарипов үз юнәлешләре буенча Минзәлә районына кыскача характеристика бирделәр.
Рөстәм Миңнеханов райондагы социаль-икътисади хәлгә уңай бәя бирде:
— Гуманитар ярдәм җыю һәм җибәрү, махсус хәрби операциядә катнашучыларга һәм аларның гаиләләренә ярдәм күрсәтү буенча эшегез өчен рәхмәт сүзләрен җиткерәбез. Аеруча якыннарын югалткан гаиләләргә даими ярдәм күрсәтү мөһим. Гомумән алганда, Минзәлә районында тотрыклы эш алып барыла, зур проектлар гамәлгә ашырыла.