Әлфия Когогина: Дәүләт Думасына кертелгән закон проекты гражданнарның хокукларын һәм аларга билгеләнгән социаль түләүләрне яклауга юнәлдерелгән
Дәүләт Думасына банк кредитлары файдасына да, башкарма производство кысаларында да бер тапкыр бирелә торган түләүләрне гамәлдән чыгаруны тыя торган закон проекты кертелде.
Дәүләт Думасы депутаты, Икътисадый сәясәт, сәнәгать, инновацион үсеш һәм эшкуарлык комитеты рәисе урынбасары Әлфия Когогина шәрехләде:
"Закон проекты Россия Президенты Владимир Путин кушуы буенча әзерләнгән һәм гражданнарның хокукларын һәм аларга тиешле социаль түләүләрне якларга мөмкинлек бирәчәк. Элегрәк миңа һәм минем коллегаларыма балалары булган гаиләләр өчен түләүләрне исәптән төшерү турында берничә тапкыр шикаятьләр килде. Бу гадел түгел, чөнки акча кредиторларга түгел, ә гаиләне авыр тормыш хәленнән чыгару өчен каралган».
«Исегезгә төшерәм, элегрәк без сәламәтлегенә зыян китергән өчен пенсияләр, алиментлар, компенсацияләр, социаль түләүләр һәм пособиеләр, гражданнарның минималь гарантияләнгән керемен бурычлары өчен исәптән чыгарудан яклау турындагы Законны кабул иттек. Тик ул чакта бер тапкыр бирелә торган социаль түләүләр аларның гамәленә эләкмәгән. Кертелгән инициатива гамәлдәге законнарга гражданнарның бурычларын түләү хисабына дәүләт ярдәме чараларын автомат рәвештә исәптән төшерүне тыя. Мондый социаль түләүләр исемлеге киңәйтеләчәк, шул исәптән аз керемле йөкле хатын – кызларга ярдәм итү, социаль контрактны да кертеп, социаль ярдәмнең барлык төрләре дә», - дип билгеләп үтте Когогина.
Шул ук вакытта, гражданинның кредит оешмасына биргән ирекле язма ризалыгы белән, социаль түләүләрне элек алынган кредитларны түләү өчен файдаланырга мөмкин булачак.