Минзәлә муниципаль районы

Р.Миңнеханов аграрийларга «Кыр көне»ндә тәкъдим ителгән технологияләрне өйрәнергә кушты

2018 елның 29 июне, җомга

Агротехника күргәзмәсе Россиянең 21 төбәгеннән, шулай ук Белоруссия һәм Венгриядән 152 компанияне берләштерде.

Татарстан Президенты Рөстәм Миңнеханов ТР Хөкүмәте йортында узган традицион киңәшмәдә район башлыклары һәм төбәк аграрийларына «Татарстанда кыр көне-2018» күргәзмәсендә тәкъдим ителгән технологияләрне өйрәнергә кушты. Бу хакта республика башлыгының матбугат хезмәте хәбәр итә.

Рөстәм Миңнеханов кичә старт алган агротехника күргәзмәсе кысаларында үткән чараларга уңай бәя бирде һәм аның оештырылу дәрәҗәсе югары булуын билгеләп үтте.

«Татарстанда кыр көне-2018» күргәзмәсе Россиянең 21 төбәгеннән, шулай ук Белоруссия һәм Венгриядән 152 компанияне берләштерде. Анда авыл хуҗалыгы техникасының яңа төрләре, авыл хуҗалыгы культураларының яңа сортлары, үсемлекләрне саклау чаралары (һ.б.) белән танышырга мөмкин.

Чара кысаларында 128 фермер федераль программалар буенча 250 миллион сумлык грант алды. Шул исәптән, 8 кооператив, эшен яңа башлаган 84 фермер һәм 36 гаилә фермасы да өлешсез калмады.

https://tatar-inform.tatar/news/2018/06/29/166895/

БАРЛЫК ЯҢАЛЫКЛАРНЫ УКУ