Туган көнендә яңа йорт ачкычы алды
Флүрә МУСИНА
Районыбызда федераль программа буенча сугыш ветераннарына йортлар төзү дәвам итә. Район башлыгы Айдар Салахов ветеранны туган көне белән котлады. Әбинең тормыш-хәлләрен сораштырды, сәламәтлеге белән кызыксынды. Ветеранга саулык, озын гомер теләде. Район ветераннар советы рәисе Заһир Зыятдинов, башка кунаклар да ветеранны котлауларга кушылдылар.
– Без авыр сугыш елларында тынычлык өчен гомерен дә кызганмаган якташларыбызны онытмаска, киләчәк буын өчен тылда фидакарьләрчә хезмәт куйган ветераннарыбызга аеруча игътибарлы булырга, торак шартларын, тормыш-көнкүреш хәлләрен белешеп торырга бурычлы, – диде район башлыгы.
Ветеранга «Мелиорация» Минзәлә ПМКсы төзегән йорт һәм төзекләндерелгән йорт яны шәһәребезгә ямь өстәп тора. Ике бүлмәле йортның мәйданы 50 кв.м. Янәшәсендә 6 сутый җир участогы бар. Йортта бөтен уңайлыклар тудырылган, җылы һәм якты, газ казаннары урнаштырылган: салкын су да, кайнар су да агып тора. Идәннәре җылытылган. Йорт янындатөзекләндерү эшләре көзен дәвам иттереләчәк, куаклар да утыртылачак.
Нәсимә Миннәхмәтова:
– Мин моңа кадәр Строительләр урамында яшәдем. Озакка сузмый бирегә күченеп киләм, йорт бик ошады, мин бик канәгать. Әлеге бүләк өчен хөкүмәтебезгә дә, район һәм шәһәр җитәкчелегенә дә бик рәхмәтлемен. Шәһәр үзәге, бөтен шартлар бар. Төзүчеләргә аеруча рәхмәт, – диде ул шатлыгын уртак- лашып.